馬匹臨場表現真係好難預測，好似立法會議員林大輝嘅愛駒「極奇妙」，最近表現確係奇妙，就連米飯班主大輝都玩埋。「極奇妙」本月中夜賽，在練馬師都睇死下奪得亞軍，帶挈大輝贏得廿幾萬獎金，直到尋日「極奇妙」再出賽，大輝依然信心不大，結果愛駒又爆冷奪冠，但佢話為咗白鴿黨黃成智，搞到趕唔切落注同拉頭馬，贏少十幾萬。
大輝為黃成智唔見十幾萬？大輝話，尋日愛駒嗰場賽事喺四時零五分開跑，佢於是決定先出席黃成智位於上水清河邨嘅議員辦事處開幕，然後諗住再趕到沙田馬場為愛駒撐場，點知黃成智個開幕禮超晒時，累佢遲咗入沙田馬場，如果趕到入場，點都會買番多少支持吓愛駒嘅；依家獨贏派九十元，起碼唔見十萬元，聲言要黃成智回水。
不過，講到尾呢單嘢都係得啖笑，事關就算幾忙都好，打個電話落注就搞掂，相信大輝叫黃成智回水都係講笑嘅啫，但黃成智累大輝趕唔切拉頭馬威威就係鐵一般事實，結果大輝嘅老友、沙田區議會主席韋國洪代佢拉頭馬。