本文重點
麗新集團主席林建岳一向少有接受電子傳媒專訪，尋日突然轉性，喺富貴黨前副主席周梁淑怡（莎姐）嘅電視清談節目亮相，傾談到尾段，大家恍然大悟，原來岳少想為好友、疑似特首候選人唐英年賽前消毒。兩年前時任財爺嘅唐唐被指坐岳少架私人飛機旅遊歐洲，有收受利益之嫌，岳少尋日話，依家自己名下冇飛機喎。
話自己名下冇飛機
唐唐被傳乘坐岳少嘅私人飛機歐遊一事，發生喺○七年五月七日至十四日歐洲休假期間，根據問責官員守則同防止賄賂條例，公職人員唔能夠收受利益，機票都算在內，當時唐唐就被質疑有收受利益之嫌，搞到要出嚟解畫，話係同朋友夾錢租私人飛機用。唐唐去完康城，同年七月做咗政務司司長，仲盛傳有心參選下屆特首，事隔兩年，岳少呢個時候重提「坐飛機」事件，仲講埋佢之前涉嫌雷射槍超速單嘢，睇嚟為唐唐賽事拆彈掃除地雷嘅味道好濃烈。
節目之中，莎姐直接問岳少有冇買飛機，岳少答：「冇。我成日被人話（有飛機），但係有時我會用囉。」莎姐追問佢點解唔買，岳少就答：「咁多朋友有，咁多朋友有。」佢仲話：「退咗休先（買）啦。」岳少話自己名下冇飛機，睇吓從邊個角度睇啦，據聞，佢的確曾經同人夾份買過飛機，但係架飛機依家去咗邊呢？咁就要問過岳少至知喇。可惜我哋唔係莎姐，唔可以喺節目度問岳少。