立法會議員葉劉淑儀今年暑假好充實，陪愛女葉榮欣返美國開學，又到紐約和費城旅遊，返到香港仲加插咗個「執女」行程。葉太尋日講，話當日清晨五點幾返抵本港後，諗住順路到東涌買杯咖啡，點知見到有個少女瞓喺街上，起初以為飲醉酒，但睇落似係食咗軟性毒品，個女仔迷迷糊糊說出住址後，葉劉就孭個女仔回家。
葉太作為前保安局局長，為何沒有即時報警處理呢？葉太話，當時無諗過報警，因為佢相信少女嘅家人懂得如何處理。「十‧一」臨近，葉太都有份獲邀上京睇閱兵，佢記得九九年在任保安局局長時都睇過一次，當時與法國領事夫人企埋一齊，由於閱兵需時，結果着住高跟鞋嘅佢企到腳痛，又無得去廁所，所以今次幾大都着對平底鞋上去，但就未使用到成人紙尿片。
葉太當選議員已有兩年，她笑稱任內有兩大成就，包括多個辦事處開創咗廿幾個就業職位，其次係揸住大葵扇撮合咗兩對新人，其中一對已達談婚論嫁地步，另一對就正在蜜運中，就係葉太愛將、灣仔區議員黃楚峰。