「十‧一」臨近，日日都有唔同嘅活動，搞到成班高官分身不暇，教育局局長孫公孫明揚就忙住準備嚟緊嘅星期日（廿七日）帶團上北京。今次嘅教育界「十‧一」交流團有成百五人，主要係同班小學、幼稚園嘅校長及老師，仲有大專院校同其他教育團體代表上京，目的當然係等大家同當地官員見吓面，亦都係想班教育界人士了解多啲國情，第日返香港落力啲推動國民教育。
呢個交流團嘅行程好豐富，廿八日一到埗就會同國家教育部副部長袁貴仁見面同食飯，翌日清晨仲會去天安門睇升旗禮，又會一齊欣賞巡遊添！不過作為團長嘅孫公就無打算參加呢啲後續節目，因為佢喺北京留兩日就要即刻返香港，事關「十‧一」前後特區政府會出現半真空狀態，特區政府喺卅日會包機上京參加國宴及閱兵活動，到時律政司司長會留港主持大局，孫公都要趕喺廿九日返港，等翌日大隊上京時，在港署理政務司司長職務。
孫公京港兩頭騰，教育局副局長陳維安屆時就代表佢跟大隊上京，連續幾日攞正牌擔大旗，賺晒！