內地盛行「隊」酒文化，相信好多港商同政客都領教過，但唔係個個飲得，好似有「棉花公主」稱號嘅行政會議成員楊敏德，就以酒膽搭夠。尋日喺個飯局見到楊敏德，三十年前開始喺大陸搞紡織業嘅佢話，在大陸飲酒傾生意，心口要掛住個「勇」字，就算唔飲得都要死頂，所以爸爸曾經讚佢「酒量五流」，但「酒膽一流」，她一直將這句話銘記於心。
身兼大珠三角商務委員會成員嘅楊敏德，又講到以前喺大陸做生意困難重重，佢無提及自己辛酸史，但就記得有次見到美心太子女、全國政協常委伍淑清哭訴牛肉無法進口到內地，結果搞咗好耐先至順利入口，限制多多，相反香港因為經濟自由開放先至做到咁成功。不過，無論去邊度做生意都好，楊敏德話做生意一定要抱住「Can do」精神才能成功喎！
講開伍淑清，佢曾經說過三十年前到內地洽談飛機餐生意，試過被對方以「門前清」方式「隊」酒，即係茅台、白蘭地同啤酒樣樣飲齊晒先至有得傾，即使至今練出酒筲箕，但飲之前都要食定幾舊牛油墊住個胃，無咁傷身嘛！