CY尋日有備而嚟，佢話香港由九六至○六年間，ＧＤＰ升咗百分之三十四，不過基層打工仔嘅收入不升反跌，加上大部分港人住宅面積少於五百呎，貧窮、住屋等問題造成社會矛盾。CY認為，問題嘅根源在於政府做事唔夠快，佢慨嘆九○年港府提出玫瑰園計劃，以機場為核心推出十大基建，只用八年時間就完成，反觀近十年不論係西九定還是啟德舊址發展卻一拖再拖，停滯不前。

CY唔知係咪擔心政府一再錯失良機，所以就前海發展主動向政府教路。佢進言話，為咗令深圳前海發展成重要嘅經濟中心，港府應放寬移民政策，令兩地交流更緊密。佢講講吓仲有感而發話，不論係買得起五千元紅酒嘅有錢人，定還是月薪僅得五千元嘅基層，政府都應照顧，促政府就最低工資立法。唔知一向鍾意飲紅酒嘅另一疑似特首候選人政務司司長唐英年聽到會作何感想呢？

以英首相喻特首關係

其實，尋日台下都問咗唔少尖銳、敏感嘅問題，但CY都輕輕帶過，絕對係太極高手。好似被問到是否支持二○一二普選時，佢只係話期望政府推出全面嘅政改方案，講咗等於冇講。被問及係咪有三個行會成員有意競選下屆特首時，CY就笑笑口話唔知有人想選特首，不過如果真係有，呢個人同特首嘅關係就好似出身工黨嘅英國首相白高敦同前首相貝理雅，又或者另外兩位出身保守黨嘅英國前首相馬卓安同戴卓爾夫人嘅關係咁喎。

CY會後解釋，呢個比喻係話同一個政府或內閣，唔同想法嘅人一樣可以共事。不過，係人都知白高敦向貝理雅逼宮上位，而馬卓安則喺戴卓爾夫人辭職後，取而代之成為首相，CY引用呢兩個例子，難怪惹起無限聯想。

獨立股評人David Webb尋日都有出席，普選問題係佢提出，佢又問CY是否贊成取消立法會功能組別嘅公司票，結果都係不得要領。