城大尋日頒發榮譽院士，當年憑「忍者龜」喺美國打響名堂嘅彩星集團創辦人陳大河都在名單之上。陳生係成功潮州商人，喺頒授禮上，潮州商會會長許學之及一班會董畀面撐場。陳大河熱心公益，由○二年起先後捐錢畀理大、城大及公大，合共捐咗四千萬元，名副其實係「教育界黃大仙」，不過陳大河好低調，將生意交晒畀公子Tommy打理，佢話八十幾歲人寧願享吓清福。
陳大河創立嘅「忍者龜」，一度成為香港玩具界奇迹，查實佢嘅奮鬥經歷更傳奇。陳大河生於潮汕普寧一個商人家庭，爸爸開設建築材料批發店，陳大河從商天分濃，中一起跟老竇學做生意，十八歲已獨當一面，六六年自創彩星公司經營及製造玩具，從此同玩具結下了不解之緣，尋日頒授儀式上，好多同事亦紛紛到賀。
不過，講起營商多年有乜心得，陳大河謙稱只有小學程度，冇諗過攞到大學榮譽院士銜頭，佢話：「我不問世事好耐㗎喇！」富而不驕嘅老闆，香港地真係好少有。