香港青年聯會主席陳仲尼喺今年中上任後，立即成立咗個政策研究委員會，尋日首次舉行發布會，就下月發表嘅施政報告發表意見。佢哋除咗要求港府加緊配合《珠三角改革發展規劃綱要》，亦特別就日益嚴重嘅青少年失業問題，提出多項具體建議，包括設立「年青企業家」計劃，協助啲青年人融資創業，以及同內地合作設立「粵港就業發展局」，協助香港年輕人北上搵食。
問到青聯係咪想加強喺社會以至政壇嘅影響力，陳仲尼就好謙咁話佢哋並非政黨或政團，甚至連論政團體都談唔上，活動純粹係出於關心社會同年輕人。
擔任研討會嘉賓講者嘅廠商會立法會議員林大輝就同我哋講，煲呔曾早前拒絕同自由黨及「五散人」就施政報告單獨會面，但其後自由黨獲邀上禮賓府同煲呔曾飲茶補數，「五散人」就因為不獲政府歸類做政團，連茶都冇啖飲吓，擺明係厚此薄彼。
大輝話，如果用結婚嚟比喻，「五散人」雖然冇正式註冊，但已經算係「事實婚姻」，可惜煲呔曾太過執着於形式，先至拒絕承認佢哋嘅關係。佢批評煲呔曾開口埋口話會加強同議員溝通，依家卻自斷溝通之路：「如果真係有心，朝早五點食早餐時可以見，凌晨食住消夜都可以見，又點會抽唔到時間呢？」