信和置業主席黃志祥愛兒黃永光漸趨高調，除咗為旗下灣仔喜帖街和大澳舊警署重建項目頻頻曝光外，最近又有新任務，就係幫馬會競駿會做大義工。尋晚跑馬地夜賽，黃永光入場為愛駒「永利多」打氣，換咗馬房，果然隨即不負所望，以熱門姿態勝出，佢話好開心，仲透露會幫競駿會做義工「拉客」，幫手邀請社會名人或富豪二代朋友入會學做馬主。
黃永光話，馬會希望佢幫手介紹認識嘅朋友接觸吓跑馬運動，一班好友分享賽馬心得外，如果贏到獎金又開心，但輸咗都無所謂，可以當做善事喎。黃永光被視為信置嘅接班人，佢認識嘅朋友肯定係非富則貴，相信可以幫馬會發掘到好多賽馬愛好者。
近期樓宇交投暢旺，問黃永光依家係咪置業好時機？佢就笑一笑，然後打開的士車門，邊上車邊話：「我都好支持環保㗎！」然後迅速關門離去，唔通佢想暗示除咗乘搭公共交通工具外，信置啲樓宇都好注重環保？