曾偉雄聽到Ｄ姐咁講，即時一邊點頭，一邊回應，不過佢講咗乜我哋就聽唔到喇，雖然我哋唔知雙方對話嘅前文後理，不過單憑Ｄ姐嗰句話，都可以推敲到佢哋講緊警察強姦一案啦。Ｄ姐講呢句話時嘅語調唔算嚴厲，而且佢個表情仲好似好同情警隊咁「家門不幸」，不過佢負責睇晒成個公務員團隊，依家用到「蒙羞」咁強烈嘅措辭，睇怕係對淫警一事影響公務員形象十分不滿。

督察協會主席認衰

香港警務督察協會主席廖潔明早前要求公務員事務局落實紀律部隊職系架構檢討時，同Ｄ姐撐到行，不過講開淫警一案，佢即時同Ｄ姐同聲同氣。佢話：「我同意佢（Ｄ姐）咁講，呢件事係警隊百幾年嚟最羞恥嘅一件事，佢形容得好恰當，任何人都可以咁描述！」廖Sir又話，警隊冇因為呢事件而士氣低落，反而各人更加努力工作，務求同淫警劃清界線，而且警隊內部已經就呢件事調整政策，例如警員用完電腦唔記得登出，部電腦都會自動鎖上，差館各房間嘅鎖匙亦更嚴謹保管。

不過，警隊醜聞一籮籮，遠有拉保育人士剝光豬搜身，粗暴對待性工作者兼食霸王餐；近有交通警截市民車輛做人肉路障，警察強姦市民等。醜聞愈爆愈大，好明顯反映警隊內部管理出現大問題，如果管理層唔改善管理，警隊嘅形象要止跌回升睇怕都幾難喇！