中華總商會近日多搞作，中總會長蔡冠深帶頭整咗一套白色制服喺月底舉行嘅「千萬行」當日亮相，點知有會董因為近日酒會連場，食得多肚腩現形，加大碼Ｔ恤都着唔落，「牛仔褲大王」兼副會長楊釗諗咗條絕橋，將Ｔ恤側邊位剪高啲，等件衫睇落大啲，遮住肚腩喎。
蔡冠深及一眾中總副會長包括陳幼南、李德麟、張成雄及林銘森等人，尋日趁召開煙花記招前秘密試新裝，攞住套Polo恤款式嘅「千萬行」制服左試右試，呢款衫設計簡單，其實唔難着，何解一眾高層咁緊張？原來係怕失禮。
楊釗靜雞雞透露，有份參加步行嘅會董擔心Ｔ恤唔啱身會大出洋相，於是提前幾日試新裝，唔少會董試身後都要求要件大碼或者加大碼衫，身形肥咗都有位走盞。不過仍有部分會董覺得唔啱身，楊釗靈機一觸參考高衩旗袍設計，將衫身兩邊剪高幾吋，造成一個小衩位，件衫睇落鬆動晒。問楊釗會否考慮將件衫側邊扯高少少綁個小結點綴吓，佢笑住擰頭話：「唔會喇，你估我係o靚模咩？」