近日酒會開唔停，工商界、婦女界、法律界等爭住聯誼，尋日輪到文化界及中華出口商會搞聯歡酒會，卓妮撞見藝術發展局主席馬逢國，佢講起跑酒會經歷，話唔好以為好過癮，馬主席自爆前日喺一晚內走咗三檔酒會，點知返到屋企依然要走落街食雲吞麵，何解咁淒涼？皆因其中一個宴會開席太遲，當佢餓住肚皮趕去另一酒會時，人家又早已開席，並且食到七七八八，晚飯當然無着落喇，所以話，應酬多都未必係好事噃。
梁鳳儀聽音樂減壓
文化界尋晚喺會展紫荊廳搞聯歡酒會，唔少演藝及文化人紛紛現身，場面熱鬧。不過講人氣，似乎唔及中出咁勁，卓妮分身兩邊走，見到財經事務及庫務局副局長梁鳳儀（Julia），提到樓市股市旺氣沖天，佢話市民心情好咗，投訴都少啲。睇嚟做高官都要識睇市民眉頭眼額至得。Julia話，依家日做十幾粒鐘，壓力難免，減壓心得係放工後即時聽iPod輕鬆吓，抖番啖氣，返到屋企再睇文件喎。
卓妮轉頭撞見商務及經濟發展局局長劉吳惠蘭，佢馬上介紹新上任嘅工業貿易署署長關錫寧畀卓妮認識，原來兩人不約而同係太極發燒友，不過劉吳惠蘭耍「吳家太極」，而關署長就鍾情「和式太極」，到底邊個門派高招啲呢？卓妮唔識分，關錫寧就謙稱話：「梗係劉吳惠蘭叻啲喇！」
白韞六拒談趙偉佳
同場仲有入境處處長白韞六，卓妮追問有關副處長趙偉佳突然放長假單嘢，係咪同處理商務及經濟發展局副局長蘇錦樑卡片事件失當有關，白處長連聲否認：「唔係，你哋唔好猜測喇，冇咁嘅事。」
有傳聞指趙Sir放完長假後會調職，白處長耍太極話：「放完假再算喇！」答得咁模棱兩可，睇怕入境處高層將有人事變動嘅傳聞，都似層層喎。
卓妮