呢嗱，聯合醫院前一排就向一名孕婦使出呢一招絕子絕孫拆子宮嘞，簡直驚天地泣鬼神。件事係咁嘅，現年二十七歲內地來港嘅鄭小姐，○七年下嫁港人男友，好快就懷孕有喜，舊年五月選擇去聯合醫院分娩。原本幸福愉快好地地，鄭小姐好期待一家三口樂也融融，點不知美夢變噩夢。

據鄭小姐講，原定朝早九點開刀生ＢＢ，但係等咗好耐都唔知等乜，期間佢要求轉院做手術，院方又唔准。等咗一大餐之後，有人將鄭小姐推咗入去手術室，打埋麻醉針。咦，咪住先，分娩打麻醉針？以功夫茶有限嘅常識，好似係唔得㗎喎，會影響胎兒健康噃。點都好啦，鄭小姐五個鐘頭之後醒番，發覺自己已經身處深切治療部，最令佢感到晴天霹靂嘅係，阿仔變弱智，子宮又冇咗！

點解會咁奇怪嘅呢？原來醫生話佢「胎盤前置」，所以要剖腹分娩，而又因為手術期間大量出血，為咗保住佢條命，所以有必要切除子宮。具體情況係點，當然醫生先至係權威啦，功夫茶唔敢講佢哋做得啱唔啱。之不過咁，切除子宮有必要問過當事人，未經同意係唔可以亂切嘅，鄭小姐有冇簽同意書呢？鄭小姐話冇，醫院話有，真係口同鼻拗。

唔怕，如果有簽同意書，梗有紀錄㗎啦，摷番出嚟對一對咪水落石出囉。唔摷猶自可，一摷弊傢伙，聯合醫院居然講出一個匪夷所思嘅神秘現象：三份聲稱由鄭小姐簽署嘅手術同意書全部唔見咗，八頁病歷紀錄又不翼而飛！

嘩！有冇咁邪呀？醫院有賊定係撞鬼？因乜解究，最關鍵嘅重要文件會忽然失蹤？唔會有人作賊心虛意圖毀滅證據啩？咁就真真正正口同鼻拗審死官嘞。

唉，鄭小姐好可憐，由於自己冇咗子宮，變成不育婦人，好想生兒育女嘅老公嫌棄佢，一走了之。換言之，冇子宮，冇老公，冇陰功！

唔知大家點諗，功夫茶就覺得，即使聯合醫院冇醫療失誤，切除子宮純粹為咗救人，但係點都欠鄭小姐一個交代。再講吖，遺失醫療紀錄無論如何都係唔啱數，當事人懷疑你隱瞞過失都好正常啫。

所以話啫，對付男人拆祠堂，對付女人拆子宮，想學？拜聯合醫院為師啦！