本文重點
呢半年醫療事故多多，派錯藥、打錯針、調錯嬰、延誤診治樣樣齊，醫管局頭大之餘，病人同家屬又激到頭頂出煙，前醫管局專業事務及人力資源總監高永文都忍唔住大呻依家醫管局管理文化變天，搞出一堆大頭佛。前日高醫生出席一個活動，本身都笑容燦爛，但一講到近期醫管局嘅失誤事件，就即刻擰歪面話：「唉！冇眼睇！」○四年離開醫管局嘅高醫生唔肯評論發生連串事故背後原因，但就話依家「年代唔同、文化都唔同」，就連醫管局政策重點都唔同咗。
變質成「趕客」文化
高醫生前前後後喺醫管局做咗十三年，佢回想九十年代醫管局，有兩個好明確目標：一係要改善公立醫院嘅服務質素、二係要多啲關心病人需要；不過依家嘅重點就變咗睇實公私營醫療系統平衡，形成「趕客」文化。高醫生舉例話，依家喺公立醫院排期睇專科，新症隨時要等兩至三年先有得睇，變相逼病人幫襯私家醫院，如果唔係分分鐘「唔係急病都等到急」。高永文本住醫者父母心嘅精神，批評呢個做法根本無考慮到病人感受，因為要病人等咁長時間，就算唔惡化都會為佢哋帶嚟好大嘅痛苦。
除咗病人唔好受，醫護人員都唔開心。高醫生話留喺醫管局最後嗰幾年，曾經畀私家醫生鬧，話只要將病人介紹入公立醫院，就算只係照Ｘ光，「都係一去無回頭」，令私家醫生無啖好食。高醫生指呢種指控唔多唔少都會對醫護人員造成壓力，搞到好似「做得好就有罪咁」，好鬼無癮，呢個亦係佢當年決定離開醫管局嘅原因之一。
高醫生話依家公營醫療服務質素雖然無下跌，但就覺得大家個心唔同咗，就算公私平衡要做，都質疑係咪要做到咁絕。立法會嘅醫學界代表梁家騮就話，公私營醫療系統失衡主因，係政府過去無好好咁推動全民醫療保險，先至令公立醫院分流唔到病人去私家醫院。即係講到尾，都係特區政府好多問題都無好好考慮，唔怪得一向講嘢平和嘅高永文講起呢個問題，都好懇切咁希望政府檢討吓現行制度會唔會「過咗龍」。