三太同象哥同獲授管理學院榮譽院士，不過二人不約而同話，唯一美中不足嘅係另一半未能出席。三太一對龍鳳胎超蓮同猷啟尋日都有嚟觀禮，三太話，當燊哥知佢獲頒榮譽院士同林肯大學榮譽管理博士後好開心，仲鼓勵佢以後多做善事，攞多幾個博士。佢笑言，燊哥依家除咗做物理治療外，仲會睇電視同叫屋企人讀八卦新聞佢聽，醫生仲批准燊哥中秋可以食少少月餅應節添。之前有傳燊哥病情穩定後，會由港安醫院轉去睇開嘅養和醫院休養，不過三太話暫時都未有呢個打算。另外，有指燊哥會喺今日動手術，二太藍瓊纓尋日探病時回應說：「啲人亂寫。」

超蓮（中）專登帶相機同媽咪玩自拍。	Christie計劃出書大談做生意嘅心得。	象哥（中）榮升管理學院榮譽院士，佢話最希望仔女「長江後浪推前浪」。（鍾麗珊攝）

超蓮爆爸爸調戲護士

一向孝順嘅超蓮原本尋日要返英國開學，不過佢寧願改搭夜機都要見證媽咪攞博士嘅一刻，佢仲教定媽咪用視像會議，等佢就算遠在英國都可以陪燊哥傾偈。超蓮之後仲大爆燊哥就算住院都不改其風趣本性：「佢（燊哥）成日調戲啲姑娘，仲話好開心有好多女人圍住佢。」

象哥嘅太太港區全國政協委員林淑儀上京開會，所以尋日嚟唔到，不過象哥嘅仔女ＫＫ同Sylvia就齊齊現身撐場，令佢開心番晒。象哥榮升管理學院榮譽院士後，即時同卓妮大講管理之道，佢覺得管理最緊要識得與時並進，除了要不斷進修外，仲要將學術應用喺實際層面上。至於獲頒管理學院院士兼林肯大學客席教授嘅Christie話自己係第一個華人女性獲此殊榮，所以格外高興，佢仲計劃出書，同大家分享做生意嘅心得。

卓妮