明愛醫院去年底爆咗一單見死不救事件，名揚海外，點知日前又發生一單先錢後醫醜聞，導致一名眼角膜受傷嘅男童被延誤幾粒鐘，真係鑊鑊新鮮鑊鑊甘。

查實呢啲事件不過係冰山一角。呢嗱，有個十歲女童因咳嗽去東涌普通科門診診所睇醫生，佢出示埋回港證，護士一樣唔當佢係香港人，要先科水二百一十五元「非符合資格人士」嘅收費至可以睇門診。

唔係啩，係人都知回港證都係合法嘅證明文件，冇理由前線人員咁無知㗎。原來呢位女童嘅回港證過咗期，診所職員話呢啲文件唔能夠證明個女童係「符合資格人士」，仲搞到要報警處理添。

喂，依家證件又唔係假，過咗期都可以酌情處理㗎。況且醫院應該以救人為先，要第一時間照顧傷者或病人，喺危急關頭仲不近人情要證件登記或先收錢，咁樣同上次伊利沙伯醫院「先收錢，後救人」有乜分別？

食物及衞生局局長周一嶽重彈舊調，佢尋日大噴口水花，強調任何有生命危險或緊急狀況嘅病人到急症室求診，無論佢哋有錢或冇錢，公共醫療系統都需要照顧佢哋。

嘩，講到幾咁偉大，係真唔係呀？其實，周一嶽無非想話畀市民聽，如果未有生命危險兼夾冇錢嘅話，咁就唔使旨意得到公共醫療系統照顧嘞。

所以呢，以周一嶽嘅邏輯，雖然眼角膜受傷隨時會盲，但冇即時生命危險，當然係可以拖得就拖啦。至於女童仲可以咳嗽，即係冇即時生命危險啦，當然唔算係緊急狀況，唔該畀錢先，或者等到再嚴重啲至睇醫生啦。

周局長，請問早前旺角發生奪命車禍有女途人畀小巴輾爆盆骨，算唔算係「有生命危險或緊急狀況」？點解伊利沙伯醫院嘅醫護人員唔係救人行先，而係要家人先放低二萬蚊買特效止血藥？

其實信周一嶽半成都死，劑劑出咗事，佢有邊次唔係出嚟做場大龍鳳，最後咪又係例牌冇人要負責？以伊利沙伯醫院調錯嬰兒事件為例，周一嶽話收到醫管局報告，正研究報告書內提議嘅連串改善措施，將醫療事故減到最少咁話。

嘥氣啦，一味只係交報告、訂指引有鬼用咩，要肯改至得㗎。醫管局夠話有一套簡稱「三核五對」指引，可以有效咁減少藥物事故，點知成套指引根本係形同虛設，難怪派錯藥打錯針依然長爆長有。

唉，成個公共醫療制度早已千瘡百孔，要徹底改革都唔係話冇辦法嘅，好簡單，唔使做長篇大論嘅報告，唔使制訂幾百項指引，只須剷除嗰啲尸位素餐嘅醫療庸官，咁就一天都光晒。