環境局局長邱騰華（Edward）同一班區議員剛剛去完日本考察焚化爐設施，呢個禮拜又有搞作，佢除咗身體力行，響應無車日，選擇坐公共交通工具外，仲會要求環境局成班同事齊齊響應，佢話希望市民都可以藉此思考點樣改善環境，減少溫室排放，不過，Edward都好老實，直言響應無車日嘅「意義大過實際作用」，咁咪即係做騷？
環境局副局長潘潔亦老早表明會緊跟局長做騷：「仲使問嘅，我老闆（局長邱騰華）一馬當先響應，我梗係要響應啦！」居於新界嘅潘潔坦言，當日要搭小巴再接駁港鐵，相信要花個幾鐘頭才返到政府總部，但為環保無計啦！至於居於北角嘅運輸及房屋局副局長邱誠武，就話副局長無固定座駕，所以都慣咗坐港鐵到中環返工。
家在港島區嘅民政事務局副局長許曉暉都支持無車日，佢話當日會提早出門口搭港鐵返工，仲會換過平底鞋等對腳行得舒服啲。許曉暉話，其家中早已推行環保政策，包括盡量少開冷氣，就算開都調校至廿五度室溫，而廚房嘅垃圾袋就會分開裝乾貨同濕貨，話咁樣可以節省膠袋喎。