嫻姐○三年頭發現患癌，依家已經好番晒，但佢對癌病仍有陰影。佢尋日出席香港乳癌基金會嘅活動，憶述當年好偶然咁發現患病，「有次喺屋企換床單，覺得左胸好痛，心諗冇理由個胸會抽筋，做檢查先發覺左乳房患上癌症。」佢之後做手術切除咗左邊淋巴，又接受電療，咁多年都暫未復發，但係仲食緊用嚟控制賀爾蒙嘅藥，「西醫話要觀察七年，但中醫就話要睇成十年先穩陣。」

佢話以前唔知缺乏運動會增加患癌機會，所以冇運動之餘，仲不斷食抗癌補品防癌，點之適得其反。佢話依家每個禮拜都會抽兩、三日行山，又聽老友汪明荃嘅勸告，唔好日日搏命工作，保持心境開朗，「以前試過喺立法會拍枱鬧人，癌細胞指數即時升咗，中醫教我按摩腳趾公個穴位一百下，有助平復心情，按完之後個人真係冇咁激動喎。」