金融海嘯一周年，唔少投資者已經按捺不住出手入市，而曾經殺到港人一頸血，有「I kill you later」之稱嘅投資衍生工具Accumulator，年初起再度活躍，近幾個月嘅成交量仲上億美元。立法會地產及建造業代表石禮謙前日語重心長話，港人買股票時認為自己可以「大魚食細魚」，但唔記得後面仲有條大鱷隨時噬你一啖就會渣都冇，所以佢覺得依家最穩陣係買「磚頭」。
大舊石話如果港人有能力，應該買番兩層樓，一間自住，一間用嚟收租，長遠實有賺喎。立法會建築、測量及都市規劃代表劉秀成都好贊成大舊石嘅睇法，佢話香港地少人多，有樓揸手點都有着數，不過佢認為依家樓市升得太快、太急，擔心一旦出事，殺傷力仲大過Accumulator，呼籲港人要量力而為。劉秀成同大舊石代表嘅業界專責起樓同賣樓，難怪佢哋會啱晒嘴形，齊齊唱好樓市啦！
劉秀成笑言，金融海嘯對佢有兩大影響，一係立法會成立小組委員會調查雷曼事宜，令身為委員嘅佢工作量大增；第二係銀行變成驚弓之鳥，令佢去親銀行買投資產品，由填表到評估要花成幾個鐘頭。