本文重點
港交所主席夏佳理（Ron）嘅人生有多次高峰，曾經擁有前馬王「翠河」，可能可以算係其中一次。「翠河」○五年去世，馬會將其製成標本，最近放置喺賽馬博物館永久展出。Ron同太太夏安麗尋日喺博物館「重遇」「翠河」，緬懷佢當日嘅威水史。
阿Ron算係一個幾幸運嘅馬主，八九年買入「翠河」，九○年出賽首季六戰六勝，包括贏埋打吡，「翠河」服役贏得總獎金近二千萬元，阿Ron贏錢仲贏埋人氣，當年立法局同僚叫佢參加直選，只要拉住「翠河」出街拉票就Sure win！「翠河」父母都係屬於佢所有，所以「翠河」就好似親生仔一樣，「翠河」九六年退役返澳洲，佢同太太都有過去探望。
其實阿Ron係資深馬迷，十多歲留學英國已同同學刨馬仔，佢話係興趣亦係挑戰，好似月初賽馬開鑼日，買咗三場三重彩同四連環就贏咗幾千蚊。大家都想知道多啲贏錢威水史，但佢望一望太座，「老婆喺度，都係唔講嘞！」幾鬼馬！
話投資賭博咪靠估
過去一年股市波動如坐過山車，唔少人覺得買股票好似買馬一樣都係賭錢，究竟邊樣勝算較大？夏佳理做過馬會揸弗人，依家係港交所主席，佢嘅心得係無論投資或博彩，最緊要係勤力做功課，唔好一味靠估！
阿Ron話，投資者入貨，至少要了解個市場、公司業績同管理層表現；馬迷想贏錢，都要刨吓馬經研究賽績。不過講到尾，佢認為賽馬始終係博彩娛樂，唔係專業投資，風險自然較大，不宜瞓身！
卓妮