遊埠工作 各走極端

卓妮早前寫過，一向貪玩嘅蔡菜子好鍾意自駕遊，不過佢之前都係去內地玩，今次就衝出中國，自駕到日本，由大阪、九州一路玩到四國，玩足兩個禮拜。

蔡菜子嘅媽媽都有同行，由於蔡老太有腳患，所以出入都要有張輪椅傍身，點知佢哋一行人去到大阪租埋車先發現張輪椅太大，放唔入車尾箱，搞到最後要去到邊借到邊，每到一個景點先問當地人借輪椅。不過蔡菜子唔單止冇嫌麻煩，仲覺得係旅遊嘅另類體驗。

至於嫻姐就同卓妮呻，話依家仲忙過做議員嗰陣。佢話，立法會議員開會只開到黃昏五、六點，處理埋其他工作，一般九點前就返到屋企，但依家同一班關注勞工福利嘅民間團體合作，次次有親活動都要搞到晚上十一、二點。嫻姐早幾年患過乳癌，當然要小心身體，不過佢自言病愈後已經觀察咗六年多，醫生話出年可能唔使再食藥添，難怪連勞工及福利局局長張建宗尋日一見到嫻姐都讚佢神采飛揚啦。

卓妮