港府講環保，真係得個講字，由佢哋使用汽車嘅態度就可以反映一二。環保大前提下，其實唔少外國政府官員已經改用細馬力嘅座駕，但係本港眾局長仲用緊超過三千至五千c.c.引擎容量嘅座駕，事實勝於雄辯，港府有幾環保，大家心中有數。

三司12局長承諾支持

九月廿二日係本港第一個無車日，截至尋日，有八十個單位參與，包括私人機構同大學，據發起無車日嘅綠色和平項目主任古偉牧透露，三位司長同十二位局長亦承諾支持，當日如無必要，唔會使用私家車。廿二日係星期二，行政會議已經抖完暑重開，有邊個司局長食言，嗰朝早去政府總部停車場兜個圈就一目了然。

不過，廿二日嘅焦點，應該係有「氣候逃犯」稱號嘅煲呔曾。無車日主要為阻地球暖化，但係煲呔曾上任多年，一直疏忽處理全球氣候問題，連各國商談解決有關問題嘅哥本哈根氣候高峰會議都唔願意去，搞到環團要「通緝」佢，如果煲呔曾繼續逃避、懶理氣候嘅暖化問題，就算班司局長幾咁努力都係無用。

所以，綠色和平呼籲煲呔曾響應無車日之餘，應該順手呼籲全港市民發揮公民力量，一齊偵察氣候逃犯，當係舉報黑煙車咁，一發現煲呔曾唔響應無車日精神，好似由禮賓府坐車落政府總部，又或者由下亞厘畢道坐車落鏞記食飯，就要舉報佢。

局長參與無車日，以教育局局長孫明揚嘅態度最投入，住跑馬地嘅佢，已經諗定當日提早出門，由屋企行去附近嘅巴士站搭一號巴士，喺置地廣場有站落車，再行上政府總部。保安局局長李少光亦話，由於家住沙田，當日朝早會坐公交上班，仲好大可能係坐港鐵過海，做人肉沙甸魚。住陽明山莊嘅發展局局長林鄭月娥就打算坐邨巴返工。環保局局長邱騰華透過發言人表示，廿二日將會全日乘坐公交。