渣打銀行開創先河發行一百五十元面額慈善紀念鈔票，掀起搶購熱潮，為公平起見，絕無內部認購，就算渣打員工都要同一般市民排隊填表購買，但有冇扣起啲靚「冧巴」就唔知嘞。呢股搶購熱蔓延至商界嘅大孖沙，好似港鐵行政總裁周松崗咁，都話要買番幾套做私人珍藏喎。
周松崗上星期都有出席渣打一百五十周年晚宴，見佢同啲渣打高層言談甚歡，拍膊頭內部認購一兩套鈔票應該無問題啩？點知周總好緊張話：「唔得㗎！雖然我係港鐵高層，但冇特權，都要排隊填表購買。」周總話，佢會買一套「四連張」鈔票，另外買多幾張「單張」鈔票，為慈善出一分力；不過就唔係佢自己親身去排隊，而係搵人去排。
渣打紀念鈔票已錄得超額認購，但同樣公開賣緊嘅東亞運動會門券銷情只係一般，港協暨奧委會會長霍震霆就希望政府再加大力度做宣傳，就算叫佢粉墨登場幫手做宣傳，佢都樂意去做，總之希望搞好咁難得嘅體育盛事。問小霍最想睇邊個體育項目，佢就笑笑口話好多個項目都想睇，唔通佢諗起未來新抱郭晶晶嘅跳水項目？