本地四大商會之一嘅香港中華廠商會年底改選領導層，前基本法委員會副主任黃保欣二子黃友嘉成為會長接班人大熱，唔少親中陣營嘅人都諗，黃友嘉可能鋪路接手埋父親嘅政治資產，啟程向從政之路進發。回歸前後期間，黃保欣個名無人不曉，黃友嘉從政，資本雄厚，不過，喺新機場大混亂一役慘變眾矢之的嘅保欣叔閂定後門，明言唔希望兒子從政！
本身經營皮革生意致富嘅保欣叔，近年已轉趨低調，佢日前出席一個「十‧一」活動時，對兒子競逐廠商會會長一職，表明全力支持，不過，提起兒子可能從政，態度一百八十度轉變，話自己走過從政呢條路，好嘥時間，又辛苦，自己難得上咗岸，唔想個仔跳番落去：「自己試過，唔希望個仔試。」唔知前文後理，仲以為保欣叔勸人唔好吸毒！
保欣叔自七二年被港英政府委任做貿發局委員開始，涉足政治，其後一入政壇深似海，一做就三十五年，七九年起被委任做立法局非官守議員，歷時九年，更加係二十三名《基本法》起草委員之一，其後做埋基本法委員會副主任，九八年當首任機管局主席、港區人大，一時「紅」遍中港兩地。不過，政治世界本無情，當年新機場開幕大混亂，政府搞獨立調查，保欣叔被傳召問話，受盡千夫所指，要佢負責，令保欣叔一度公開大嘆「不值得為香港人做事」。保欣叔依家唔想兒子從政，莫非「一朝被蛇咬，十年怕草繩」？