唔經唔覺「體操王子」李寧喺香港落地生根已經三年，尋日健康快車搞咗個「武林群英會光明」活動，身為副主席嘅李寧都現身撐場。李寧下海從商做得有聲有色，三年前佢透過輸入內地人才計劃成為香港人，仲帶埋一家大細來港定居，囝囝李小寧亦喺香港學校讀書。本身係南方人嘅佢，笑笑口話佢同囝囝都適應得幾好，事關香港有自己嘅特色同特殊文化，好似尋日咁，有咁多人出席健康快車嘅籌款活動，可見香港係一個幾咁有愛心嘅社會。
早前李寧因為脊椎骨刺增生要入院做手術，不過佢話呢次舊患復發同去年做京奧凌空點火無關，有可能係做體操運動員時留下嘅舊患，但主要都係年紀大啦，幸好依家康復得唔錯，仲可以游水添！講起年底喺香港舉行嘅東亞運動會，李寧話佢都會買飛捧場，不過暫時都係休養至上。
同場仲有健康快車創會主席小吉方黃吉雯。年屆六十嘅小吉容光煥發，佢透露秘訣係保持心境開朗外，每日步行一萬步，佢仲經常佗住部計步器保持進度，如果晚上發現唔足數就出街行到足為止。咁有恒心，難怪十年如一日啦！