政府有意推行電子教學，但就十畫都未有一撇，相反小童群益會嘅一班「小特首」已經喺佢哋嘅「小小施政報告」裏面，詳細介紹電子教學嘅概念同推行計劃嘅細節。出席呢個「小小施政報告」發布會嘅教育局副局長陳維安（Kenneth）都自嘲︰「小特首交功課仲快過我，我都仲未交畀局長！」
Kenneth藉呢個機會，同各位小特首分享自己年輕時代嘅經歷。佢問在座十幾位小特首有幾多人有facebook同手提電話、有幾多人用呢啲電子科技嚟互通消息？結果在場全部小朋友舉晒手話有用，Kenneth也有感而發，話呢一代同佢細個嗰時已經好唔同，何解？原來Kenneth年輕時都好前衞，佢話，七十年代末期、八十年代初期佢仲讀緊中學嘅時候，當時先開始有個人電腦，但係佢已經同啲朋友仔自己「砌機」，但嗰陣又冇互聯網，又冇電郵，砌完都唔知有咩用，得個「砌」字。
Kenneth兜咁大個圈，都係想同啲小特首講，識用電腦都唔係最重要，反而係要識得利用新科技去學習，先至得物有所用。