13/09/2009

播放本新聞相關短片

政情:憲報又鬧笑話玩謝三局長

去年底發生嘅泰國包機鬧劇,再次凸顯高官問責制千瘡百孔,本身冇副局長幫手署任嘅保安局,局長李少光一放假或外訪就變成「無人駕駛」。政府其後因應事件微調過有關分工安排,但就畀人批評為換湯不換藥甚至亂上加亂。近日李少光再次離港,但竟然爆出登錯憲報署錯任嘅天大笑話,證明整個問責制幾咁混亂不堪,亂到政府內部都搞唔清楚,睇怕連問責高官都被搞到氹氹轉。

保安局冇副局無得署任

現時設有副局長嘅政策局局長離開香港,會由副局長頂上署任,並須刊登憲報公告天下,但如果有關政策局冇副局長幫手,就唔使安排署任同刊憲,令該局變成「無人駕駛」。包機事件發生後,政府修改做法,安排呢啲冇副局長嘅政策局常任秘書長,喺局長離港期間出席政府每朝舉行嘅早禱會,代替離港局長匯報局內事務,但相關決策權同政治責任誰屬,依舊唔清唔楚。

李少光上周日起接連出訪內地、印度同放假幾日,到本月二十一日先至返番工。政府前日刊憲,公布會由運輸及房屋局局長鄭汝樺(Eva)同食物及衞生局局長周一嶽輪流署任。我哋最初仲以為政府吸取咗包機事件嘅教訓,終於肯改變過往「無人駕駛」、冇人署任嘅荒謬安排,點知細問之下,先至發現原來只係誤會一場。

保安局發言人解釋,根據現行署任安排,如果李少光離港期間立法會有會開,政府會喺內部安排政制及內地事務局局長林瑞麟做替工到立法會開會,咁啱呢輪林D9亦唔得閒,於是就循例搵咗Eva同周一鑊頂上,但有關安排唔等於署任,亦毋須刊憲,今次純粹係有人「手民之誤」,先至鬧出笑話,唔涉及任何政策改變,佢哋會喺下周五嘅憲報作出更正。

問及今次玩殘咗幾名局長嘅,究竟係保安局定係行政署嘅人,發言人就話不必深究,總之保安局會孭咗呢隻鑊喇!

其實今次已經唔係政府首次就問責高官嘅署任安排刊錯憲,去年底政府刊憲宣布民政事務局局長曾德成將會離港公幹,由副局長許曉暉署任,但其後被本報踢爆搞錯咗,曾德成只係私人休假而唔係公幹。須知憲報係具有法律效力嘅嚴肅官方文件,咁都可以一錯再錯,以後仲點樣叫市民相信政府講嘅嘢?