本文重點
青少年發展聯會主席陳振彬（Bunny）籌辦嘅德育發展中心尋日正式啟用，由於中心選址正係位於鰂魚涌培志男童院舊址，所以Bunny邀請咗一位特別嘉賓出席，佢就係發展局局長林鄭月娥。娥姐同培志男童院好有淵源，事關娥姐當年在任社會福利署署長時管過培志，其後培志摺埋丟空，變身搞德育發展都要經發展局娥姐嗰關。
難得重遊舊地，唔知有乜感受呢？娥姐劈頭就話：「以前呢個地方我管㗎！做社署署長時，男童院啲仔打親交都要我上嚟，成日都上嚟，後來因為覺得地方太細，所以將男童院搬到『六合一』嘅青山綜合院所，現在再批畀青少年發展聯會使用。」娥姐話，直至現在，啲男童耐不耐都會寫信畀佢。
政助抽籤輪流揸Fit
培志男童院舊址位於一個山坡上，要行百多級石級，卓妮見娥姐同德育發展中心名譽校監馮兆元拾級而上，氣都唔喘吓，可能真係以前經常上男童院訓練有素都未定。Bunny早前講過馮Sir主要教青少年步操學習紀律，馮Sir同卓妮講，話喺警隊做咗幾十年乜都夠皮，唔會再出山打工，只會幫手做吓有意義嘅工作。
尋日除咗娥姐捧場外，Bunny仲請咗分屬老友嘅金牌經理人黃柏高、前警隊一哥李明逵、鄉議局主席劉皇發兒子劉業強、民政事務局政治助理徐英偉。見到徐英偉，於是問佢政助選召集人搞成點，點知佢爆料話大家抽「生死籤」，由教育局政治助理楊哲安抽中，做幾耐就無講到，但大家會輪流做召集人，無大細之分，總之人人有份，永不落空！
卓妮