卓妮尋日同張太傾起今次音樂會，佢自爆識咗雲迪八、九年，今次係兩人第四度攜手合作。張太一向係音樂發燒友，安排過另一年輕鋼琴家郎朗來港表演，最近亦情迷古典吉他演奏家楊雪霏，不過佢謙稱自己唔識玩樂器，只係喺熱愛古典音樂嘅醫生老公張力正耳濡目染下，每晚一放工跳上座駕就會扭開Hi-Fi聽歌，對李雲迪嘅瘋狂度更不在話下，一早已經買齊晒所有佢嘅CD。

楊沛宜來港獻唱

講番今次音樂會陣容，除咗李雲迪外，仲搵埋喺京奧開幕禮作幕後獻唱嘅楊沛宜，唱番○八奧運主題曲《我和你》，並與劍橋大學合唱團一齊即席表演。張太盛讚小妮子潛質無限，今次請佢來港表演，正好畀個機會佢顯吓真功夫。

李雲迪登場，喺城中掀起撲飛潮。據聞音樂會另一位籌委會成員、四叔李兆基公子李家誠亦會出席，此外富豪二代包括何鴻燊千金何超雲及霍震寰千金霍思緯亦會抽空捧場。

張太話，音樂會後仲有下場，就係移師去四叔旗下嘅The Mira Hong Kong（美麗華酒店）舉行慈善晚宴，會有三百幾位政商界名人出席。當晚收益將撥捐多個機構，包括演藝學院、女童軍及英國劍橋大學等，皆因今年係劍橋大學成立八百周年，張太老公係劍橋醫學院舊生，公子Adrain及千金Amanda亦分別就讀劍橋法律系及經濟系，淵源咁深，張家又點會唔出一分力呢？

卓妮