大家可能唔明功夫茶講緊乜，不如講得詳細少少。銅鑼灣告士打道近糖街有一條行車天橋，橋底有一間面積大約五百平方呎嘅儲物房。呢間古古怪怪嘅儲物房唔知係屬於邊個嘅，斷估唔會係私人物業啩，九成係政府財產，之不過咁，記者問勻全世界，冇一個政府部門可以提供確實答案。

更加古怪嘅事情發生嘞，記者親眼見到有一位年約五十歲嘅阿叔，居然擁有儲物房嘅鎖匙。阿叔嘅身份又係神神秘秘，記者再去問勻全世界，同樣冇一個政府部門答得出佢係何方神聖。唔通真係有私人物業？唔好玩啦，天橋底肯定係公共空間，如果唔係，曾經被揭發喺天橋底起咗一間屋嘅富豪就唔使拆屋。

神秘阿叔既然有鎖匙，即係可以動用儲物房啦，你估佢點用呢？功夫茶相信佢係天橋底商業奇才，阿叔將儲物房變成街坊迷你倉，招收客戶，收取租金。幫襯最多嘅係外籍傭工，存放物件大部分係地墊。你知啦，外傭每逢放假，好鍾意約埋鄉親鄉里三五知己去公園打地鋪，附近有個迷你倉畀佢哋存放地墊的確係方便㗎。至於收費咯喎，根據外傭透露，地墊收二十，大件就五十。以此估計，迷你倉每月可賺幾千蚊。

除咗外傭，仲有冇其他閒雜人等幫襯呢？當然有啦，各式各樣乜人都有。之但係咁，唔敢肯定神秘阿叔會唔會拒絕不法分子存放危險物品。

講到呢度，大家可能會話，人哋廢物利用啫，阿叔搵少少錢啫，冇乜問題吖。本來功夫茶都係咁諗，不過諗深一層又唔同講法。喂，天橋底係公共空間吖嘛，如果可以任由私有化，咁全港所有天橋底係咪都可以用嚟開舖頭做生意呢？如果係咁，功夫茶第一時間飛撲去鵝頸橋底開一間茶餐廳，貪佢人流夠多，善男信女搵神婆打完小人，幫襯飲杯奶茶食個餐，幾爽㗎。

假如你腦筋轉得夠快，良心又擺埋一邊，你甚至可以將天橋底私有化之後，開一間丸仔飯堂，專門招呼濫藥男女，出示學生證仲有八折優惠，咁你就可以大發黑心財嘞。

政府作為全港大地主，即係公共空間管理人，到底知唔知道天橋底私有化會有乜嘢後遺症？功夫茶相信特區官僚係唔知嘅，如果知道，神秘阿叔就冇可能經營天橋底迷你倉近十年啦！

總而言之，公共管理低能化，遲啲如果你見到有人經營天橋底妓寨，財爺曾俊華可能會笑口噬噬同你講，都好嘅，鼓勵內需，刺激經濟！