泛民主派最近提出「五區總辭」，政界認為如果做過九龍東票后嘅工聯會前立法會議員陳婉嫻肯出山參選，有一定機會喺九東補選中撼低泛民，打散泛民借總辭變相進行公投嘅如意算盤。不過據聞嫻姐私下就有好大保留，佢諗住自己年紀已經有番咁上下，退出咗就無謂捲土重來，不過有工聯會核心話，若然個會計來計去覺得嫻姐都係最佳人選，唔可以排除出山嘅可能。
我哋尋日喺金鐘撞到嫻姐，佢封晒口話，之前都有好多傳媒就總辭問題問過佢，佢一概唔發表意見，就算同我哋咁老友都冇情講，佢咁講，即係唔肯封死後路。對於工聯會四名立法會議員計劃加強分工同個人形象，嫻姐就大表贊同。佢話工聯四子有三個都係新丁，喺第一年形象唔夠深入民心，係好正常嘅事，相信佢哋經過一年熟習同磨練，再作出分工做番自己擅長嘅工作，好快就可以喺市民心目中打響名堂。
問佢會唔會過番幾招畀啲後輩，嫻姐就話「不在其位，不謀其政」，亦唔想佢哋跟住前人嘅影子走，似乎想畀空間新人去發圍。