IQ博士黃宜弘去年連任立法會中總代表後，表明下屆唔再參選。據悉，香港中華總商會正醞釀人選做IQ博士接班人，當中以慈善家方潤華嘅兒子方文雄、全國政協委員黃英豪同大律師廖長江嘅呼聲最高。中總尋日舉行周年會員大會，交代過去一年工作，兩位熱門接班人方文雄同廖長江都有現身會場。
不過，廖長江尋日一聽到接棒傳言，即時封口：「你哋去問阿頭（中總會長蔡冠深）啦！」反而方文雄被問到係咪會接替IQ博士時，佢就笑笑口話：「依家言之尚早。」佢仲補多句：「如果IQ博士唔連任，仲有廖生呢！」方文雄冇正面回應有冇興趣競逐立法會議席，只係一味讚兩個對手都係好人選，之後仲不忘為中總講好說話：「我哋個會歷史悠久，過百年都咁和諧、冇爭拗，就算邊個做都係好事。」
雖然方文雄對於接棒嘅傳言笑而不答，但就講到明唔擔心做立法會議員會冇晒私人時間，換個角度睇，即係佢都冇封從政後路，亦唔排除他朝一日會出任議員啦！方文雄講講吓，忽然有兩個中總會員走埋嚟同佢握手，二人臨走前仲趁機幫佢拉票：「遲啲就由佢接任（議員）喇！」搞到方文雄哭笑不得。