激進民主派早前未經飯盒會正式討論，搶閘公開提議喺五個立法會地方選區，各派出一名泛民議員辭職，然後透過補選變相畀全港選民就政改問題進行公投。其實有關建議幾年前已提過，但因為有太多實行問題而擱置，依家激進派重提舊事，又未能提出解決辦法，仲將所有持保留意見嘅泛民盟友，一律打成民主叛徒，令民主黨及公民黨等主流民主派相當不滿，質疑激進派只想玩「屈機」博出位。

言猶在耳，公民黨前日又高調召開記者會，公開提出比「五區總辭」更激進嘅「雙辭方案」，聲言如果泛民喺五區補選勝出後，中央同煲呔曾仍堅拒讓步，廿三名泛民議員應集體辭職抗議。公民黨又黑箱作業自製咗份五區總辭名單，其中港島區同九龍東由該黨嘅陳淑莊同梁家傑辭職，新界東西就由「長毛」梁國雄同民主黨李永達請辭，九龍西就唔知點解揀咗阿基。

做法冇誠意唔民主

事前毫不知情嘅阿基，炮轟公民黨嘅做法冇誠意兼唔民主，佢話自己嬲嘅並非無喇喇畀人點名辭職，而係不滿公民黨未經內部諮詢同討論，單方面提出雙辭方案，尤其公民黨之前先喺飯盒會狠批過激進民主派玩屈機，依家自己玩埋一份，有口話人冇口話自己。佢慨嘆政改方案仲未開始諮詢，泛民已自製內訌、互相廝殺，將來正式諮詢想唔滿地鮮血、屍橫遍野都幾難。

公民黨就解釋，佢哋前日上午舉行集思會敲定雙辭方案後，心諗與其傳媒亂引述，不如自己公布，於是喺召開記者會前致電各黨派打底，不過阿基話，第一個打電話問佢回應嘅，唔係公民黨，而且公民黨唔係問佢意見，係知會佢。公民黨佢哋再向民協主席廖成利解釋補鑊，但未能平息阿基怒火。

據聞公民黨點名阿基辭職，係認定佢係泛民最弱一環，如果佢肯參與總辭，將來難再公然轉軚支持政府；否則阿基唔肯，就變相逼佢「現形」。無論點都好，泛民能否團結一致，將來佢哋點辭法，就要睇落去至知喇！