醫院管理局威逼公立醫院醫生簽減薪同意書風波，導致醫生同管理層反枱，以集體辭職反擊，行政總裁蘇利民最終向醫生道歉認衰先收到科。不過，蘇利民似乎只能暫時㩒住下屬嘅反擊行動，根本平息唔到醫學界嘅怒火，公共醫療醫生協會會長何栢良尋日喺大氣電波，炮轟醫管局管理層行事一意孤行，難聽啲簡直就係霸王硬上弓！
醫院管理局威逼公立醫院醫生簽減薪同意書風波，醫生職系協商委員會十六名醫生以總辭招數反擊成功，外界覺得公營醫生今次打贏一仗，不過何栢良尋日語重心長咁話，其實今次無人贏，醫生頂多都只係輸少咗，因為件事已經傷咗管理層同埋前線員工之間嘅感情，實情大家都係輸家。
何栢良講到火起，怒揭醫管局高層高高在上嘅囂張醜態，爆有啲喺總部印印腳攞緊高薪嘅總監級人馬，幾年嚟連佢真人都未見過，間唔中去醫院「出巡」，都勞師動眾，次次都廿幾三十人幫佢哋開路，咁樣又點可能真正聆聽到員工心聲呢？