特區官場，仕途難測，余志穩以首長級第四級嘅官階，署任首長級第六級嘅社署署長兩年之久，但一直未能升正，就宣告退休，成為近年嘅官場「冤案」。余志穩睇得開，對自己官運表現得無怨無悔，反而，政界忍唔住為佢發聲，左中右議員都公開稱讚佢嘅工作表現同態度，社福界破天荒喺報章賣半版廣告，讚佢係良心署長。估唔到呢幕咁墟冚嘅場面，仲有續集，今次走出嚟為余志穩抱不平嘅人，係同屬前高官行列嘅肥亨。

肥亨話，同余志穩係港大同學，但每年只係見到一至兩次，以前在官場交手機會亦不多，只記得余志穩在任民政事務局副常秘期間，曾配合佢落實取消遺產稅，當時覺得余志穩人如其名，做事好「穩」陣，做得頭頭是道。肥亨直言，余志穩在位時得到讚譽，退休之後，仍然好評如潮，真係相當難得，未能升正首長級D6，實在令人可惜！

官場受委屈 感同身受？

肥亨對余志穩呢番不平鳴，說來字字鏗鏘，睇番肥亨嘅經歷，佢○八年因得悉自己得了腦病而辭官，當時同樣獲得議員同傳媒一致好評，算係喺民望高峰之中光榮引退，同余志穩嘅情況有幾分相似，唔知係咪咁，所以對余志穩受「委屈」，感覺特別強烈呢？

余志穩未能升正，政圈有好多揣測，有人話當年劉勵超曾以D4級署任屬D5嘅地政署署長長達六年，退休時同樣無得升正，但亦有人話，已退休嘅譚榮邦，○六年由房屋署副署長轉任郵政署長時，都有得升職喎。不過，一切已成過去，誰是誰非，都唔可以為余志穩翻案，佢筆退休金亦唔會調整，所謂塞翁失馬，倒不如展望將來。