本文重點
前教統局局長李國章（阿瑟王）無官一身輕，現時主力幫手打理家族生意，閒時偕太太一齊出席公開活動。中大尋日舉行北山堂捐贈文物展覽開幕暨利榮森博士銅像揭幕典禮，利榮森夫人、久違了嘅政壇元老利國偉及利子厚等利希慎家族後人齊出動，連做過中大校長嘅李國章都同太太出席湊熱鬧，同現任校長劉遵義兩代校長齊齊出席，利家認真夠面子。
卓妮難得見到阿瑟王，問佢究竟依家搞緊乜？點知佢又講笑話：「做醫生做唔掂，咪搵啲生意搞吓囉！」其實阿瑟王口中嘅搞生意，即係幫手打理家族銀行生意。既然搞得銀行，當然要考吓佢點睇財金官員口中嘅「經濟曙光」啦！阿瑟王好似堪輿學家口脗話：「九月、十月千祈唔好掂股市！」卓妮聽到當堂戙起耳仔。
話熱錢好快流走
阿瑟王娓娓道來，話去年雷曼迷債爆煲後，股市一直跌到落谷底，今年快速回升到二萬點水平，皆因歐美投資市場環境太差，熱錢自然流入香港市場，港股亦順勢大升；不過現時歐美嘅投資氣候好番啲，熱錢就會好快流走，股市隨即回落。
佢仲話只係睇到呢兩個月嘅走勢，長遠就唔睇到嘞，唔通阿瑟王收到風個股市喺呢兩個月會有大批資金流走？
卓妮