十大基建只聞樓梯響，應該同特區政府凡事慢幾拍嘅施政作風有關。好似最近全城爆水管爆到阿媽都唔認得，灣仔告士打道直情爆到交通癱瘓，反映水務署更換老化水管嘅速度慢過蟻躝，由一九九九年開始，換呀換，換呀換，三年又三年，三年再三年，換到今時今日仍然未換得晒。難得水務署署長馬利德夠晒幽默，佢好抵死咁話水管係「突然老化」喎。係人都知，一夜白頭只不過係傳說，實際上冇嘢可以「突然老化」，功夫茶打死都唔信馬署長一覺瞓醒變咗風燭殘年老人精。

凡事慢幾拍呢家嘢，真係唔到你唔服。大工程就話有一大堆藉口慢條斯理啫，又要研究，又要諮詢，又要集資，小工程又點呢？等功夫茶同大家講一個古仔，包你以為盂蘭鬼節撞晒鬼。

大角咀鐵樹街有一個休憩處，面積唔係好大㗎咋，三百七十四平方米，大概就係三千幾平方呎。政府話喎，用一百多萬元整靚佢啦，原本計劃九個月之內完工。

呢嗱，先唔講實際進度係點，計劃用九個月時間修葺一個豆腐膶咁細嘅地方，有冇問題先？正常嚟講，即使係裝修一間三千幾平方呎嘅住宅單位，頂多三個月乜都做完啦。普通一個休憩處，對於工程專家嚟講，手板眼見工夫，一定唔會複雜得過住宅單位，又唔使鋪牆紙，又唔使做衣櫃，又唔使裝門鎖，咁都要九個月？兩個字加一個感嘆號：搵笨！

原本計劃已經搵笨，實際進度更加黐筋，九個月過咗嘞，鐵樹街休憩處仍然係一幅爛地！

呢嗱嗱嗱，又係官僚主義累事，民政事務總署將工程外判出去就算鬼數，到底有冇開工又唔理，到底有冇蛇王又唔管，卒之工程一拖再拖，街坊街里想去休憩處搵張櫈坐下都唔得。你知啦，老人家好鍾意約埋三五知己打牙骹，休憩處長期封閉唔用得，你叫退休長者點樣過日辰？所以話啫，撞正一個慢成咁嘅龜速政府，簡直就係撞鬼。

見微知著，一葉知秋，你見到小小一個鐵樹街休憩處，等於見晒規模龐大嘅基建工程。簡單講句，小工程慢吞吞，大基建更搵笨。

十大基建到底幾時開工呢？又到底幾時完工呢？功夫茶祝大家長命百歲，咁就應該有機會見到喇啩！