「新界王」發叔劉皇發身兼多職，鄉議局之外，仲入埋行政會議，其實佢一直想栽培公子劉業強（Kenneth）接棒，身為屯門區議會主席嘅發叔，將屯門十‧一活動嘅重任交畀Kenneth負責，喺屯門青山灣搞煙火匯演同大型沙灘音樂會。Kenneth尋日以屯門區節目活動籌備工作小組召集人身份，介紹本月十九日舉行嘅銀花耀屯門煙火匯演。
Kenneth一向比較低調，尋日嘅表現都不過不失，對表演地點、經費、門票派發地點嘅日期同時間等都倒背如流，明顯做足功課。雖然煙火比煙花較細規模，但都要花唔少錢。Kenneth話煙火匯演同音樂會分別要花一百五十多萬元同一百萬元，煙火匯演由贊助商贊助，音樂會就由區議會出錢。睇番主要贊助商名單，其中一間係永同益集團有限公司，Kenneth就係呢間公司副主席，即係自己撐自己，仲唔係出錢出力？
屯門九六年喺黃金海岸搞過除夕煙花匯演，但交通安排失當，市民怨聲載道。今次劉業強初擔大旗，不能有失，屯門民政事務專員張國財話已同十二個部門用八個月時間準備，有信心比十三年前有好大進步，仲拍晒心口話市民喺一個小時內可返到屋企。