煲呔曾十月公布新一份施政報告，一班無咩知名度嘅副局長同政治助理紛紛落區主持地區諮詢會，一來有啲細藝，二來多啲曝光。一直被睇高一線嘅食物及衞生局副局長梁卓偉，尋日就同政治助理陳智遠返番佢份工負責嘅觀塘主持諮詢會，反應似乎幾好。
首先係佢夠運，抽到支好籤，觀塘區居民坐滿成個禮堂不特止，中途仲要不斷加座位。好彩之外就係識講嘢，梁卓偉一開口就講自己同觀塘區嘅關係，話過一年落過觀塘幾次，再返觀塘好高興，又大讚觀塘居民好合作，都係希望做好一件事。正所謂「伸手不打笑面人」，咁大頂高帽，居民梗受落。
梁卓偉另一撒手鐧就係愈答愈長。雖然話今次只係聽意見，街坊每人得兩分鐘提問，每六個人問完就答一次，梁卓偉次次都答超過十二分鐘，有誠意得來又控制到時間，難怪成場無乜甩轆。