揸住八大院校資源分配大權嘅大學教育資助委員會（簡稱教資會），成日畀人話閂埋門做嘢，自己顧自己，唔少院校中人都唔妥佢，早排仲搞到畀立法會動議要求檢討教資會嘅職能。教資會主席史美倫見勢色唔對群情又洶湧，拿拿臨做嘢補鑊，周不時叫齊班記者交代工作進度，仲親自踩入大學，提高知名度添。
其實有無做嘢明眼人一睇就知，但係唔知史美倫係咪擔心曝光率唔夠高，尋日同記者會面嘅時候，就大鑼大鼓同人講自己做過咩。
查太仲話，有啲院校佢會落去成三、四次，今年仲有個會面主題，就係同教務會嘅教授打交道，依家只係剩低三間未做，不過已經排晒期咁話，總之一間都唔會少。其實多啲同院校溝通係好事，但佢賣花讚花香，就似乎Hard Sell咗啲！