專業會議尋日見煲呔曾，就施政報告反映意見，梁美芬在會後提及啱啱喺前日同班深水埗區議員聯手，成功反對政府喺港鐵南昌站毗鄰嘅六號地盤發展公屋，有望改為興建大會堂。點知話音一落，企喺佢旁邊嘅劉秀成唔知有心定無意，接口話自己係房委會委員，唔反對興建公屋；仲話千祈咪將自己唔鍾意嘅嘢推畀第二個區去做，擺明暗寸梁美芬。

梁美芬聽到即時起晒弶，反駁話自己唔係反對興建公屋，而係唔想起高樓產生屏風樓效應。兩人火花四濺，認真失禮，但點都唔夠民協咁失禮，事關該黨一直支持在六號地盤興建公屋，對於區內私人屋苑提出嘅反對意見卻視而不見，結果房屋署及規劃署寫好晒建議文件上區議會討論，該黨先至臨時同白鴿黨一齊轉軚反對興建公屋，簡直浪費公帑。