灣仔告士打道大前日爆水管，搞到中環大塞車，咁大單新聞，港府梗係唔想畀民主派攞威啦，馬利德本來應承甘乃威第二朝見面，都要臨時急轉彎，急召埋其他黨派議員一齊開會。港府成日視民主黨為反對派，馬利德代人出手玩甘乃威，可以理解，建制派理論上拍掌稱慶都嚟唔切，但事實上卻係另一回事，建制派內好多人被馬利德激到爆血管。

話打晒畀全體議員

工聯會提起水務署呢單嘢即刻扯火，指水務署約見各黨派議員，一向代基層發聲嘅工聯四名議員，竟然無一個人收到水務署開會通知，算點先？呢位工聯議員又質疑水務署亂咁嚟，召集議員開會毫無準則，如果只係搵港島直選議員，點解前日有功能組別議員到場？如果邀請工務小組委員會委員，點解唔係委員嘅進出口界黃定光又現身？

自由黨張宇人（Tommy）尋日亦不滿話，該黨主席劉健儀同方剛都不在港，佢哋收唔收到水務署電話唔知，佢就肯定無收過，佢都好想知水務署點解唔搵佢。我哋問Tommy會唔會聽唔到水務署電話？Tommy語帶嘲諷咁話：「打電話畀我，一打就通，沒理由水務署特別黑仔啩！」

我哋打電話畀水務署，發言人第一次回應指，電話由馬利德嘅秘書打出，打晒畀全體六十位議員，可能有議員聽唔到電話喎。不過工聯會方面斷言，四名議員翻查過Call機秘書台服務，前日朝早無水務署留言，議員辦事處職員亦冇接過電話。水務署其後主動來電補飛，指電話不止由一人打出，需要時間求證係咪打晒畀所有議員，但署方最後書面回覆，話只能夠交代到當日成功通知「大部分議員」。

馬利德失魂周身蟻

水務署無論點解畫，今次因為辦事甩漏，陷自己於議會內左右不討好嘅窘局，相信有排煩。除咗工聯同自由黨打算追究外，甘乃威更加餘怒未消，尋日揚言去信公務員事務局，投訴馬利德不稱職，等佢冇得做署長。睇嚟馬利德今次擺和頭酒都擺到窮囉。