本文重點
近年香港教育制度朝令夕改，搞到莘莘學子無所適從，有經濟能力嘅家長寧願將仔女送出國讀書，都唔想仔女做白老鼠成為教改下嘅犧牲品。好似啱啱「升呢」做自由黨常委嘅莎莎國際主席兼行政總裁郭少明，為咗讓細仔Patrick入到美國優秀嘅大學，寧願放棄暑假外遊，都要留港陪囝囝上補習班。
郭老闆個細仔Patrick平時好少在公開場合曝光，卓妮尋日就好彩遇到佢兩父子在香港會食晏，問開至知原來郭老闆今個暑假無去旅行，事關要陪Patrick參加美國學術評估測試（SAT）嘅補習班。今年十七歲嘅Patrick，明年就會升大學，郭老闆較心儀美國學府，所以急召一直在英國讀預科嘅Patrick返香港考SAT試，做好準備。
白手興家嘅郭老闆曾經講過，仔女一定要讀大學至有出頭，所以為咗將囝囝培育成材，就算犧牲成個暑假也在所不計，Patrick都好應該體諒父親嘅一片苦心，辛苦啲都要㗎喇！
田少力薦 黨內升呢
我哋尋日講過郭老闆在自由黨內更上一層樓，由中委升到上常委，正式進入黨高層核心，據聞係前黨主席田北俊力薦上位，充分反映該黨積極鞏固工商黨地位。
卓妮