本文重點
金融海嘯話咁快又一年，雷曼迷債風波暫時平靜落嚟，財經事務及庫務局兩位高層最近趁暑假相繼外遊充電，局長陳家強啱啱去完泰國皇室避暑勝地華欣抖一抖，常秘「頭箍小姐」區璟智則緊接局長放假，佢去咗地中海多個國家自駕遊。區璟智係意大利品牌MOSCHINO嘅擁躉，去到意大利米蘭肯定勁掃時裝，睇嚟今次佢要荷包大出血囉！
區璟智同陳家強早幾日孖住去香港會食晏，卓妮見佢哋離開時笑到四萬咁口，唔知係咪因為雷曼迷債回購進度理想吖、抑或係陳家強仲喺度回味緊華欣之旅，而區璟智就未出發先興奮呢？無論點都好，區璟智呢一刻已經身在地中海興奮緊。其實她在今年二月出任常秘之後，一直忙到無時停，依家總算可以放假鬆一鬆，同上任前嘅日本之旅只係相距半年，都唔算太耐。
陳家強泰國豪歎
曬得一身陽光膚色嘅陳家強，盛讚華欣陽光普照但涼風送爽，唔似香港咁熱，而且私隱度高，夠晒安全。華欣位於泰國灣以西，與芭堤雅隔岸相望，係泰國最傳統嘅海濱勝地，出名遠離煩囂，因而吸引泰國皇室喺度建行宮抖暑，當地治安亦堪稱係全泰國最好嘅。陳局長度度地方唔揀係都要揀華欣，唔通佢想去華欣學做泰國王族？
卓妮