領匯自○五年接管大部分屋邨商場後，翻新工程即沒完沒了。不過，最近翻新工程正進行得如火如荼的樂富中心，變身後卻被指設計失誤，零售舖改為食肆後未有做好排氣設備，令樓上居民日夜被排風口噴出熱氣「煙熏」，更遭噪音轟炸，「搞到冇日安寧」。區議員與關注團體狠批領匯管而不善，罔顧居民利益。
樂富中心一期與橫頭磡邨宏順樓相連，二至四樓屬商場，五樓以上為公屋單位。商場於○七年開始翻新，近月商戶陸續開業，居民的噩夢亦隨之而來。
住所變蒸籠朝朝熱醒
黃小姐居於宏順樓五樓，日前發現單位樓下舖位變身為酒樓後，加裝的排氣喉管每日不停排出熱氣，由早到晚不斷向上升，令住所變成「蒸籠」，「以前下面係零售舖頭，依家變咗酒樓，個煙囱對正我個窗，攻晒啲熱氣上嚟，搞到又熱又嘈！」
商場四樓除開設酒樓外，亦有多間食肆開張，黃的鄰居同受影響，其中邵太便勞氣地說：「樓下新開嗰間食肆一開工，我個露台就㷫合合，我個仔瞓喺露台，朝朝都熱到醒！」另一居民黃先生亦大吐苦水：「自從下面開咗間餐廳之後，屋企就成日都好鬼熱，我哋日日都要開冷氣，電費都貴咗唔少！」
經本報轉介後，領匯隨即要求有關酒樓改善排風位，問題暫且解決，黃小姐亦鬆一口氣，「酒樓依家裝咗抽氣管，將啲熱風吹番向下面，暫時叫做冇問題啦！」
被斥冇道義冇責任感
當區區議員陳偉坤狠批領匯只着眼盈利，罔顧居民利益，「翻新商場只係想租多啲畀食肆商舖，根本冇諗過樓上有人住，更唔會諗啲油煙影響到人！」陳指近期接獲多名居民投訴，並曾聯同房屋署及領匯負責人視察，最後領匯亦要求酒樓加建抽氣管，「領匯從來冇諮詢居民意見，諗住側側膊就算，收到投訴又係叫番商戶改善，從冇諗過係自己設計有問題！」
「租畀食肆係最賺錢嘅，仲邊會理得樓上有住人？領匯咁做根本就冇道義、冇責任感！」領匯監察主席陶君行直言，以往房署管理商場時，會以考慮居民需要為首，並會作出平衡，因此認為長遠解決方法只有回購商場管理權。
領匯發言人回應事件時強調，食肆廚房在設計時已落實加裝冷氣系統，以減少對上層單位的滋擾，而排風口亦已改裝在距離民居之位置。
記者 梁少儀