「股海怎麼翻波，親戚怎麼囉唆，張添福朱小冰相戀的經過，資料相當清楚。不想聽都不可，心中開始起火。叔公身家幾多，師姐專攻商科，擠迫車廂中私隱集體廣播。」

呢首歌仔嘅意思其實係話，香港人好鍾意喺搭車嘅時候大大聲聲講電話，不但自己個人嘅私事，甚至親戚朋友嘅隱事，一五一十公諸於世，三唔識七嘅陌生乘客被迫接收大量「關人隱事」。如果你患咗先天性諸事八卦症候群，你可以成為自我暴露私隱線嗰條茂里嘅知心好友，一程車半粒鐘等同共赴患難三十年。之不過咁，唔係咁多人鍾意八八卦卦，冇乜興趣知道張添福點樣溝得掂朱小冰。

好嘞，聽完歌仔，聽聽古仔：警隊原來係茂里，侵犯人權私隱線！

話說咯喎，有一位市民何先生，兩個月之前喺長沙灣一個垃圾收集站發現大量警署口供文件，部分記錄偷竊案詳情，被捕者姓乜名乜住响邊一忽，甚至身份證號碼個人資料統統一覽無遺。何先生心諗，有人唔小心啫，所以冇理會。

點不知，過咗兩個月之後，何先生又喺垃圾站發現大疊大疊警署口供紙，大部分係填寫被捕內地妓女資料嘅空白表格，不過其中有兩張記錄咗一名涉嫌賣淫嘅姓黃雙程證女子檔案，有齊○六年喺深水埗街頭被捕過程以及個人資料，連證件影印副本都有。

另外有六頁紙更加誇張，清楚顯示一名姓陳警員嘅詳盡個人履歷，包括證件號碼、住址同埋加入警隊年份等等。

一次就話唔小心啫，因乜解究一而再洩露機密？唔使問阿桂，一定係警察叔叔漠視人權，連自己友嘅私隱都唔肯好好保護。立法會議員王國興批評，警隊已經唔係第一次外洩資料，實屬嚴重違反私隱條例以及保密原則。王議員又嚴厲譴責：「點解警務人員做嘢會咁隨隨便便？無論係乜嘢檔案，都應該小心處理，咁樣等同帶頭犯法，絕不能容忍！」

唉，講到侵犯人權私隱線，功夫茶好自然就諗到警隊獨步江湖最擅長嘅撒手鐧「剝你光豬擒拿手」，咁野蠻嘅搜身程序有冇改善呢？警方受唔住輿論壓力，舊年七月一日開始實施「搜身三級制」，第一級「毋須脫衣」，第二級「脫去衣服」，第三級「脫去內衣」。從數字上嚟睇，的確係有少少改善嘅，今年一月剝光豬嘅次數係三百七十，去到五月，次數減至二十八。之不過咁，即使數字少咗，依然平均每日一次剝光豬，你唔可以話警方已經學識尊重人權。打個譬喻吖，一隻老虎每日殺死十隻羊，固然係非常殘忍，後來變咗每日殺一隻，你絕對唔可以話老虎係「善良的小貓」。

點樣先至可以令到警隊真真正正尊重人權呢？不如咁嘞，搵黑客入侵各大警署電腦系統，日夜不停集體廣播《私隱線》，應該可以洗腦啩。