怪醫梁家騮喺電台話，經人手做嘅嘢，做成千上萬次點都有可能出錯，所以唔需要經人手嘅，醫院都盡量唔經人手。而且醫生好講經驗，依家公立醫院每日都會由唔同級別嘅醫生巡房，務求做到包底，盡量避免事故發生。

本身係外科醫生嘅怪醫，行醫多年，電台主持問佢有無發生過醫療事故，佢好坦白咁話「我自己梗係醫死過人啦！」而且醫生多數會買十萬至卅萬蚊不等嘅專業責任保險，如果醫生真係咁叻、唔出錯的話就唔使買啦！對於呢啲令人遺憾嘅事，怪醫話佢會檢討自己做錯啲乜，日後一定唔會再犯。

佢仲話前輩同佢講，每個醫生嘅招牌下面都有幽靈托住，有個人見到位醫生個招牌下面無鬼就去幫襯，點知嗰個人就變成第一隻，事關個醫生太新喎！唔通睇醫生前，都要用陰陽眼睇睇個招牌先？