俗語有云：「入屋叫人，入廟拜神。」新官上任嘅社會福利署署長聶德權（Patrick），尋日到訪屯門區議會前就先拜地主。唔係趁今日鬼節講鬼古，而係Patrick上星期預早撥個輪知會鄉議局主席兼屯門區議會主席劉皇發，不出所料，在發叔主持下，會議無風無浪，絕對無為難呢位「三耳四眼」新署長。
Patrick咁畀面發叔老人家，發叔亦毫不吝嗇在電話中提點吓啲後輩。近期正生書院爆出投資醜聞，兼且有八成學生領取綜援交學費，據聞發叔在電話中叫Patrick跟緊啲濫用綜援個案，話依家申領綜援無王管，浪費公帑之餘，仲令真正有需要嘅人得唔到幫助。咁啱得咁蹺，發叔呢個睇法同尋日區議會其他議員發表嘅意見一樣，要求Patrick檢討綜援制度。
發叔仲話，究竟正生書院能否落戶梅窩，要睇廉政公署調查成點，即使廉署唔公布個調查結果，但政府最終都要有個定案。不過，無論結果係點，發叔都質疑：「正生咁多問號，係咪仲堅持要落戶梅窩呢？」