民政事務局副局長許曉暉經常在公開場合大談湊女經，但原來佢仲有個話題可以發揮吓。職業訓練局轄下知專設計學院搞咗個創意藝術展覽，請咗許曉暉做嘉賓，當佢睇到黑白相展品時，就回想起因為受中學美術老師影響，令佢愛上黑白攝影，直到現在用數碼相機幫囡囡影相，都採用黑白模式拍攝。
許曉暉憶述，當年就讀張祝珊英文中學時，美術老師好好，教繪畫仲教埋攝影及黑房曬相技術，佢接觸黑房後覺得好有興趣，但由於屋企無可能設立黑房，惟有利用學校黑房練習，只要學校開門，佢都甘願留堂或放棄周末放假時間走進黑房去，不過好可惜，昔日嘅攝影作品，已經喺過去幾次搬屋嘅時候唔見曬。
許曉暉大讚黑白相好有味道，但現在已很難找到黑白菲林及沖曬用品，只能運用數碼相機嘅黑白攝影功能，做出黑白相嘅效果。身兼職訓局主席嘅立法會議員梁君彥對攝影都好有興趣，佢自稱小學五年級已開始玩黑房，但自投身社會工作後，因為工作太忙，已經好耐無玩攝影嘞。