甘威首先喺上午call晒涉及前日告士打道爆水管鬧劇嘅五個政府部門，雲集佢嘅議員辦事處開會；中午又約咗康文署同建築署去將軍澳東亞運會場，視察被形容為豆腐渣工程嘅跑道設施；到下午再帶埋幾名擦鞋匠，由戲院里遊行上佢辦事處同食環署官員開會，要求政府從速發牌畀佢哋。

不過喺爆水管會議召開前約半粒鐘，甘威就收到水務署署長馬利德電話，話佢哋同另外四個部門都唔會嚟開會，改喺灣仔水務署總部見佢。甘威上到去之後，更發現另外有六名保皇黨嘅立法會議員同區議員在場，令佢非常火滾，炮轟水務署言而無信兼涉嫌妨礙議員工作，聲言會去信馬利德嘅老闆發展局局長林鄭月娥同公務員事務局局長俞宗怡投訴事件。

有議員事後就笑言，甘威以前都喺擦鞋匠問題上，截過啲泛民主派盟友嘅胡，今次水務署只係以其人之道還治其人之身，冇得怨人。